Latest News

പുറത്താക്കിയ സഭയുടെ സെമിത്തേരിയില്‍ നിന്ന്‌ ഭര്‍ത്താവ് ഭാര്യയുടെ മൃതദേഹം ബലമായി കടത്തിക്കൊണ്ടുപോയി സ്വന്തം സഭയില്‍ സംസ്‌കരിച്ചു

2017-05-18 02:48:43am |

തിരുവല്ല: ഭാര്യയുടെ മൃതദേഹം ബലമായി കടത്തിക്കൊണ്ടുപോയി സ്വന്തം സഭാ രീതിയില്‍ സംസ്‌കരിച്ചു നാടകീയരംഗങ്ങള്‍ സൃഷ്‌ടിച്ച്‌ ഭര്‍ത്താവ്‌. മാര്‍ത്തോമ്മ സഭാ വിശ്വാസിയായ എലിസബത്ത്‌ ഏബ്രഹാമിന്‌ സ്വന്തം സഭാ സെമിത്തേരിയില്‍ അന്ത്യവിശ്രമം കൊള്ളണമെന്നായിരുന്നു അന്ത്യാഭിലാഷം. എന്നാല്‍ യുണൈറ്റഡ്‌ ചര്‍ച്ച്‌ ഓഫ്‌ ഇന്ത്യ ബിഷപ്പായ ഭര്‍ത്താവ്‌ റവ. സണ്ണി ഏബ്രഹാം പനച്ചൂമൂട്ടില്‍ പിടിവാശി കാട്ടി മാര്‍ത്തോമ സഭയുടെ സെമിത്തേരി പറമ്പില്‍നിന്ന്‌ എലിസബത്തിന്റെ മൃതദേഹം ബലമായി കടത്തിക്കൊണ്ടുപോയി സ്വന്തം സഭാ സെമിത്തേരിയില്‍ സംസ്‌കരിച്ചു. ഒരു വിഭാഗം സംയമനം പാലിച്ചതുകൊണ്ടു വലിയ സംഘര്‍ഷം ഒഴിവായി.

തിരുവല്ല സെന്റ്‌ തോമസ്‌ മാര്‍ത്തോമ്മ പള്ളിയില്‍ ഇന്നലെ വൈകിട്ട്‌ നാലുമണിയോടെയാണ്‌ നാടകീയ രംഗങ്ങള്‍. സണ്ണി ഏബ്രഹാമിന്റെ ഭാര്യയും വടശേരിക്കര മാമൂട്ടില്‍ തെക്കേതില്‍ കുമ്പനാട്ട്‌ കുടുംബാംഗം ടി.ഇ. വര്‍ഗീസിന്റെ മകളുമായ എലിസബത്ത്‌(53) കഴിഞ്ഞ 12നാണ്‌ നിര്യാതയായത്‌. ജീവിതാവസാനം വരെ വിശ്വസിച്ച സഭാവിശ്വാസപ്രകാരം കുടുംബകല്ലറയില്‍ തന്നെയും അടക്കണമെന്നായിരുന്നു എലിസബത്തിന്റെ ആഗ്രഹം. എന്നാല്‍ മര്‍ത്തോമ്മ സഭയിലെ മുന്‍ വികാരി കൂടിയായ സണ്ണി ഈ ആഗ്രഹത്തിനു വിഘാതം നിന്നു. സണ്ണിയെ 10 വര്‍ഷം മുമ്പ്‌ മാര്‍ത്തോമ്മ സഭയില്‍നിന്നു പുറത്താക്കിയെങ്കിലും എലിസബത്തിന്റെ അംഗത്വം നിലനിര്‍ത്തിയിരുന്നു.

പരേതയുടെ ആഗ്രഹപ്രകാരം അവരുടെ ഭവനത്തില്‍ മാര്‍ത്തോമ്മ സഭയിലെ മെത്രാപ്പോലീത്തമാരും വൈദികരും എത്തി സംസ്‌കാര ശുശ്രൂഷ നടത്തിയിരുന്നു. തുടര്‍ന്നു മാര്‍ത്തോമ്മ പള്ളിയില്‍ എത്തിച്ച മൃതദേഹത്തിന്‌ അവസാനഘട്ട സംസ്‌കാര ശുശ്രൂഷയും നടത്തി. എന്നാല്‍ ഭാര്യയുടെ മൃതദേഹം സംസ്‌കരിക്കാന്‍ പ്രത്യേക സെല്‍ വേണമെന്ന ആവശ്യവുമായി ഇതിനിടെ റവ. സണ്ണി ഏബ്രഹാം രംഗത്തെത്തി. പ്രത്യേക സെല്ലിനു പകരം കുടുംബ കല്ലറയില്‍ അടക്കാമെന്ന്‌ കമ്മിറ്റിയംഗങ്ങളും ഇടവക വികാരിയും നിര്‍ദേശിച്ചുവെങ്കിലുംസണ്ണി ഏബ്രഹാം വഴങ്ങിയില്ല.

തുടര്‍ന്ന്‌ ഇരുവിഭാഗങ്ങളും തമ്മില്‍ ചര്‍ച്ച നടത്തിയെങ്കിലും ഇരുകൂട്ടരും വിട്ടുവീഴ്‌ചയ്‌ക്കു തയാറായില്ല. തുടര്‍ന്നാണ്‌ സഭാവിശ്വാസികളെയും ശുശ്രൂഷയ്‌ക്കെത്തിയ വൈദികരെയും കാഴ്‌ചക്കാരാക്കി റവ. സണ്ണി ഏബ്രഹാം എലിസബത്തിന്റെ മൃതദേഹം കൊണ്ടുവന്ന അതേ ആംബുലന്‍സില്‍ തിരികെ കൊണ്ടുപോയത്‌. പിന്നീട്‌ വൈകിട്ട്‌ ആറരയോടെ വള്ളംകുളം ചര്‍ച്ച്‌ ഓഫ്‌ ഗോഡിന്റെ ആഞ്ഞിലിത്താനത്തുള്ള സെമിത്തേരിയില്‍ മൃതദേഹം സംസ്‌കരിക്കുകയായിരുന്നു. സംഘര്‍ഷ സാധ്യത കണക്കിലെടുത്ത്‌ വന്‍ പോലീസ്‌ സന്നാഹം സ്‌ഥലത്തെത്തിയിരുന്നു. വൈദികരുടെയും കമ്മിറ്റിയംഗങ്ങളുടെയും സമയോചിത ഇടപെടല്‍ സംഘര്‍ഷം ഒഴിവാക്കി.